Yfirlýsing frá Stofnun múslima á Íslandi.

Yfirlýsing frá Stofnun múslima á Íslandi.

Reykjavík, 1. júlí 2016.

Vegna fréttar á vefsíðu RÚV í gær vill Stofnun múslima á Íslandi koma eftirfarandi á framfæri: Í frétt á vefsíðu RÚV, www.ruv.is , í gær var því haldið fram að sænskur ríkisborgari sem gekk í raðir hryðjuverkasamtakanna ISIS tengist Stofnun múslima á Íslandi ses. Tengingin átti að vera tilkomin vegna vinnu mannsins sem smiður fyrir Al-risalah samtökin í Svíþjóð. Af þessu tilefni vill Stofnunin taka það fram að Stofnunin er sjálfstæður lögaðili í rekstrarformi sjálfseignarstofnunar. Það form gerir það að verkum, að enginn á félagið, heldur er það rekið af stjórn þess. Engin eignatengsl eru milli Stofnunarinnar og annarra félaga. Það að sömu aðilar sitji í stjórn Stofnunarinnar og erlendra félaga í samskonar starfsemi, þ.e. trúar,- menningar- og æskulýðsstarfsemi, skapar ekki tengsl þess við hryðjuverkasamtök af neinu tagi, enda hefur Stofnunin aldrei stundað eða tengst slíkri starfsemi né neinni annarri ólöglegri starfsemi.

Innan raða múslima, jafnt sem öðrum hópum fólks, eru alls kyns aðilar, og sumir hverjir ákveða að tengjast hryðjuverkasamtökum af hvaða tagi sem er. Á því getur Stofnunin ekki borið ábyrgð, enda getur hún ekki á annan hátt en aðrir kannað bakgrunn starfsmanna. Sá starfsmaður sem hér um ræðir starfaði í stutta stund á vegum Al-risalah samtakanna í Svíþjóð, en kom aldrei til Íslands og ekki er forsvarsmönnum Stofnunarinnar ekki kunnugt um að hann hafi tengst múslimum á Íslandi. Þess ber að geta að umræddur maður starfaði síðar í tvö ár hjá hinu opinbera í sveitarfélaginu Malmö, þ.e. Malmö kommun. Auðsætt er að sveitarfélagið Malmö eða vinabæir þess um víða veröld geta ekki borið ábyrgð á því að starfsmenn þess velji að ganga til liðs við hryðjuverkasamtök enda sæta þau ekki, né heldur aðrir vinnuveitendur mannsins, gruggugum ásökunum um tengingar við hryðjuverkasamtök af þessum sökum.

Að þessu sögðu vill Stofnunin því vísa sögusögnum fréttastofu RÚV um tengingar við erlend hryðjuverkasamtök til föðurhúsanna, og krefst afsökunarbeiðni frá RÚV fyrir ásakanirnar um tengingar við ISIS. Formleg krafa þar um, ásamt kröfu um skýringar, verður send RÚV frá lögmanni Stofnunarinnar allra næstu daga. Um er að ræða alvarlegar ásakanir, sem virðast ekki byggja á öðru en slæmu viðhorfi í garð múslima.

Stofnunin ítrekar að markmið hennar er að vinna að uppbyggingu Islamskri trú og menningarheimi á Íslandi með íslensk lög að leiðarljósi. Stofnunin hefur ekki stutt, og mun aldrei styðja, ólögmætar aðgerðir eins og hryðjuverk, í neinum tilgangi. Þá mun Stofnunin ekki skaða Ísland, hagsmuni þess eða líf Íslendinga á neinn hátt. Jafnframt vill Stofnunin taka fram að hún fordæmir hryðjuverk í hvaða mynd sem er, og hvar sem þau eru framin.

F.h. Stofnunar múslima á Íslandi,

Hussein Aldoudi og Karim Askari.